ബിന്ദിപ്പൂക്കൾ.
അവൾ എന്നും ചിലച്ചുകൊണ്ടു വരും .കറുത്തു കുറുകിയ ഒരു ബംഗാളിപ്പെണ്. ആരോഹിയിൽ ഞാനവളെ നിരഞ്ജന എന്നു വിളിച്ചിരുന്നു.
കില് കിലേച്ചിരിക്കുന്ന തടിച്ച മുഖവും ഉരുണ്ട കൈകളും , ചെറിയ കണ്ണുകളും ഉന്തിനിൽക്കുന്ന മാറിടവും ,വിലകുറഞ്ഞ ചുമന്ന ചായം തോന്നിയപടി തേച്ചുപിടിപ്പിച്ച ചുണ്ടുകളുമുള്ള നിരഞ്ജന.
തലയിൽ ബിന്ദിപ്പൂവ് ചൂടി , കയ്യിൽ ഒരു ചെറിയ മൊബൈൽ പിടിച്ചു തുള്ളിത്തുള്ളി നടക്കുന്ന നിരഞ്ജന.
അവൾ അകത്തേക്ക് കയറുമ്പോൾ ബിന്ദിപ്പൂക്കളുടെ മണമായിരുന്നു.
ഒരേ സമയം നിതംബമിളക്കി തെറ് തെറെയെന്നു ഓടി നടന്നു ആ വീട്ടിലെ പണികൾ മുഴുവൻ ചെയ്തു തീർത്തിരുന്നു.
ഞാൻ ആ വീട്ടിൽ അതിഥി ആയിരുന്നു.
ക്ഷണിക്കപ്പെടാത്ത അതിഥി
ആതിഥേയത്വത്തിൽ വെറുപ്പ് പ്രകടമാക്കാതെ തൽക്കാലികതയിൽ കുടുംബത്തിലെ ആണൊരുത്തന് പെണ്ണായി വന്നുകയറിയൊരുവളുടെ പണിക്കാരിയെ പൂർണ്ണമായും വീക്ഷിച്ചിരിക്കുക എന്നത് മാത്രമായിരുന്നിരിക്കണം ആ കാലയളവിൽ എന്റെ നേരം പോക്ക്.
വന്നുകയറിയ പെണ്ണൊരുത്തി കാണാതെ പോയ മോതിരത്തിനു വേണ്ടി അന്നൊരിക്കൽ നിരഞ്ജനയുടെ കഴുത്തിൽ പിടിച്ചു ഞെരിച്ചു ഭിത്തിയോട് ചേർത്ത്‌ നിർത്തിയതും, മിനിട്ടുകൾക്കുള്ളിൽ വന്നുകയറിയ പെണ്ണൊരുത്തിയുടെ കൂട്ടുകാരൻ അയാളുടെ കാറിൽ വീണുപോയ അവളുടെ കാണാതെ പോയ മോതിരം തിരികെ നൽകിയതും , നിരഞ്ജന കണ്ണുതുടച്ചു , ഭാഭി ഞാനിത് ആരോടും പറയില്ല എന്നു ഉറപ്പ് നൽകി സാരി നേരെയാക്കി , പാത്രം കഴുകൽ തുടർന്നതും, പോകും നേരം വന്നുകയറിയ പെണ്ണൊരുത്തി വച്ചു നീട്ടിയ നൂറിന്റെ ഒറ്റനോട്ട് മടക്കി ബ്ളൗസ്സിനുള്ളിൽ തിരുകി നടന്നകന്നതും, അവളുടെ വീണുപോയ ബിന്ദിപ്പൂവ്വ് വന്നുകയറിയ പെണ്ണൊരുത്തി ചവിട്ടിയെറിഞ്ഞതും കണ്ടിട്ട് മിണ്ടാതെ ചലിക്കാതെ ഇരിക്കുവാൻ കഴിഞ്ഞത് എനിക്കുള്ള അപാരമായ ക്ഷമകൊണ്ടാണെന്നു പിന്നീട് തിരിച്ചറിഞ്ഞിരുന്നു.
വെള്ളയും മഞ്ഞയും ബിന്ദികൾ കൂട്ടിച്ചേർത്തവൾ പിറ്റേന്നാൾ കുലുങ്ങി വന്നു.അന്നവൾക്ക് ഒരു കഷണം ബർഫി കൊടുത്തു അതിന്റെ വിലപറച്ചിൽ നടത്തി വന്നു കയറിയ പെണ്ണൊരുത്തി അവളെക്കൊണ്ടു പൊടിപിടിച്ച സർവ്വ വസ്തുക്കളും തുടപ്പിച്ചു.
അന്നവൾ കൂലി കൊടുത്തില്ല പകരം പോകും നേരം ഒരു ബർഫികൂടി കൊടുത്തു.
നിരഞ്ജന അതു വിഴുങ്ങി, കൈകൾ നൊട്ടിനുണഞ്ഞു പാദസരം കിലുക്കി അച്ചായന്റെ വീടും കടന്നു അച്ചായന്റെ മകനെ കെട്ടിയ തുണിയുടുക്കാത്ത സോണിയയുടെ വീട്ടിനുള്ളിലേക്ക് കയറി.
അച്ചായന്റെ അച്ചായത്തി ചൂലും പിടിച്ചു ഇത്തിരി തിണ്ണയിൽ ഇറങ്ങി നിന്നത് പാളിപ്പോലും അച്ചായന്റെ കണ്ണേർ നിരഞ്ജനയ്ക്ക് എൽക്കാതിരിക്കാനാണ്.
സോണിയ നിരഞ്ജനയ്ക്ക് പിന്നാലെ കൂർപ്പിച്ചു നടന്നു.
ഇനി ഒരു മണിക്കൂർ,
പിന്നെ നിരഞ്ജന കുലുക്കി കുലുക്കി നടന്നു പോകും.
പിന്നെ വരുന്നത് അച്ചായത്തി ഉറങ്ങിക്കഴിഞ്ഞ് , വന്നുകയറിയ പെണ്ണൊരുത്തി കസർത്തു കഴിഞ്ഞു നാലുകാലിൽ വന്നുകയറിയ ശേഷം പാതിരാവിലാണ്.
അച്ചായന്റെ വീട്ടിലേക്കവൾ കയറില്ല, ഗ്രില്ലിനിടയിലൂടെ അവൾ എതിരെ വാരണാസ്സിക്കാരൻ തടിക്കാരന്റെ ഗലിയിലേക്ക് നടന്നു കയറും.
മുഴുവൻസമയവും പുകച്ചുകൊണ്ട് എഴുതി ജീവിക്കുന്ന ഒരു പത്രക്കാരൻ എന്നാണു വന്നുകയറിയ പെണ്ണൊരുതിപറഞ്ഞു കേട്ടത്.
ഒടുവിലവൾ കയറിപ്പോയൊരുനാൾ തിരിച്ചിറങ്ങുന്ന പാദസ്വരകിലുക്കം കേട്ടില്ല.
പകൽ വന്നുകയറിയ പെണ്ണൊരുത്തി കസർത്തിനൊക്കാതെ ഞെളിപിരികൊണ്ടു.
അന്ന് ആ വീട്ടിൽ ബിന്ദിപ്പൂക്കൾ മണം പരത്തിയില്ല.
അന്ന് പാത്രങ്ങൾ കുന്നുകൂടി അവിടെ കിടന്നു.അന്ന് ആ വീട്ടിൽ ഭക്ഷണം ഉണ്ടാക്കപ്പെട്ടില്ല.
വിശപ്പ് കൊണ്ട് ഞാനാദ്യമായി വന്നുകയറിയ പെണ്ണൊരുത്തിയെ തുറിച്ചു നോക്കി.
അട്ടഹസിച്ചു പൊങ്ങച്ചതിളപ്പിൽ കൊച്ചമ്മമ്മാർ കൂട്ടചർച്ച നടത്തി.
സോണിയയും , വന്നുകയറിയ പെണ്ണൊരുത്തിയും,മാത്രമല്ല രണ്ടു വെള്ളാപ്പാറ്റകൾ കൂടി വീട്ടിൽ ഭക്ഷണം വച്ചില്ലെന്നു കൊച്ചമ്മക്കൂട്ടത്തിന്റെ അസഹിഷ്ണുതയിൽ നിന്നു മനസിലാക്കി.
ബിന്ദിപ്പൂവിന്റെ മണവും വയറ്റിൽ കത്തിക്കയറിയ വിശപ്പും എന്നെ നിരാശയാക്കി എന്ന് തീർച്ചപ്പെടുത്തും മുൻപേ ഗലിക്ക് മുൻപിലെ നിരത്തിൽ ഒരു അംബാസിഡർ വന്നു നിന്നു,
ചുമന്ന പട്ടുചേലയുടുത്തു, കയ്യിൽ ഒരു ബൊക്കെയും മാലയുമായി അവളിറങ്ങി,ഒപ്പം ആ വാരണാസിക്കാരനും.
അവർ മുകളിലേക്ക് നടന്നുകയറി, അവൾ തലയിൽ ബിന്ദിപ്പൂക്കൾക്ക് പകരം മുല്ലപ്പൂ ചൂടിയിരുന്നു., അയാളുടെ സുഹൃത്തുക്കളെന്നു തോന്നുന്ന കുറെയധികം മനുഷ്യരും അവർക്കൊപ്പം മുകളിലേക്ക് പോയി , വന്നുകയറിയ പെണ്ണൊരുത്തി മുഖ വലിച്ചുകയറ്റി നിലത്തതാഞ്ഞു ചവിട്ടി, അച്ചായത്തി സമാധാനത്തോടെ ചിരിച്ചു, തുണിയുടുക്കാതെ വൃത്തികെട്ട കക്ഷം കാണിച്ചു നടക്കുന്ന കുളിക്കാത്ത സോണിയ ഫോണിൽ ഏതോ ഒരു സേട്ടിനെ വിളിച്ചു ജോലിക്ക് ആളെ വേണമെന്ന് പറഞ്ഞു.
മാസം 800 രൂപയിൽ കൂടുതൽ കൊടുക്കില്ല എന്നും പറഞ്ഞു.
വന്നുകയറിയ പെണ്ണൊരുത്തി ഫോണിൽ ഉടപ്പെറന്നോനെ വിളിച്ചു പയ്യക്കം പറഞ്ഞു , വീടിനുള്ളിൽ കയറി ഗ്രിൽ വലിച്ചിട്ടു ഉറഞ്ഞു തുള്ളി, ഒരുങ്ങിച്ചമഞ്ഞു വെളുത്ത കക്ഷവും വയറും കാണിക്കുന്ന തുണിയുടുത്തു ഉടപ്പിറന്നൊന്റെ കൂട്ടുകാരൻ ഡോക്ടറുടെ വണ്ടിയിൽ കയറി കസർത്തിനു പോയി.
വിശപ്പ് , വയറ്റിൽ താളം തീർത്തപ്പോൾ , എതിരെ മുകളിൽ മുല്ലപ്പൂമാലയുടെ അറ്റത്തു ഒരൊറ്റ ബിന്ദിപ്പൂ തൂങ്ങിയാടി.
ആ ബിന്ദിപ്പൂ നിരഞ്ജനയുടെ തലയിൽ കണ്ടുപിടിക്കാൻ എനിക്ക് കഴിഞ്ഞിരുന്നില്ല.
ആ ബിന്ദിപ്പൂവിന് ഏഴു നിറങ്ങൾ..
നിരഞ്ജനയുടെ കണ്ണിലെ എന്ന പോലെ.
പിറ്റേന്നാൾ ബിന്ദിപ്പൂ വച്ച ഒരു മെലിഞ്ഞ പെണ്ണുവന്നു,ഒതുങ്ങിയ അരക്കെട്ടുള്ള ഒന്നുപെറ്റ പെണ്ണ്.
വന്നുകയറിയ പെണ്ണൊരുത്തി 800 രൂപ എണ്ണിക്കൊടുത്തു, കൃത്യമായി വരണമെന്ന് ചട്ടം കെട്ടി,
അവൾ പണിതീർത്തു, സോണിയയുടെയും, അചായന്റെയും കൊച്ചമ്മമാരുടെയും വീട്ടിൽ കയറി, ഒടുവിൽ വാരണാസിക്കാരന്റെ വീട്ടിലേക്ക് നടന്നുകയറി.
നിരഞ്ജന പാട്ടുസാരിയുടുത്തു വാതിൽ തുറന്നു കൊടുത്തത് ഊളിയിട്ടു കണ്ടു,
വന്നുകയറിയ പെണ്ണൊരുത്തി ഉറഞ്ഞുതുള്ളി,
രണ്ടുമൂന്നു ഗ്ലാസ്സുകളും പ്ളേറ്റുകളും പൊട്ടി, ഒരിടതല്ല ശബ്ദങ്ങൾ പലയിടങ്ങളിലും കേട്ടു.
അപ്പോളും ആ ബിന്ദിപ്പൂ തൂങ്ങിയാടി..
©️സൂര്യ
23/09/2020
©️
